آنه و صدیقی سافرت ، رحنه الشمال اوطانهم
شفنا هابس خیر و فرح ، و احنه الگحط باوطانه

عدهم فواکه کل شکل ، کلشی و کلا شی اشجارهم
و احنه حبابوک و نبگ ، و الخروع احلی اشجارنه

عدهم عمایر عالیه و اشحلوه ذیچ ادیارهم
و احنه الصرایف من گصب ، تلعب الروح ادیارنه

المای اصفی من الذهب ، و عیون تجری بمایهم
کارون صایر مزبله و ریحة مجاری بماینه

اطفالهم بالمنتزه ، و اشحلو لعب اطفالهم
و احنه اللی مامش منتزه بالعجد لعب اطفالنه

یحچون کلهم گیلکی و ماکو خلط بلسانهم
و احنه حویج و خربزه و مشبوش بحچایاتنه

اصخولهم ترتع ورد، فوگ الیبال اصخولهم
و غنیمنه تاکل تبن ، عاگول اچل ایمالنه

حتی چلبهم منتشع ، یعجبنی طبع اچلابهم
و احنه چلبنه من التعب ، نایم ابعتبة بابنه

نسوانهم بیض و حمر و مدللات ابیالهم
ملیانه من ضیم و قهر مگروده یا نسوانه

عدهم رواتب عالیه ، و متوظفین اولادهم
و احنه البطاله و الکسل و ادمان سهم اولادنه

تمطر هناک ابرهدنه ، و تختلف حتی غیومهم
واحنه سمانه بیه حصو ، مایعول ایبخ گاعنه

عدهم مزارع و اسعه و عایش بعز فلاحم
تبچی علی حاله و کل وکت ماکول حگ فلاحنه

عدهم من انواع السمچ و شگد لذیذه اسماکهم
گطانه فر و ملخ من نشفوا نهرانه

ایخبزون بانواع الخبز بربری و سنگک عیشهم
واحنه فطیر و محترج ما تنعلس خبزاتنه

ماشفنه دحره و لاعرک متفاهمین ارجالهم
واحنه المشاگف و الچتل و العطوه عند ارجالنه

بس چایهم چای الوطن
ما تشفی طبخة چایهم

مهیل و یشفی الگلب
کل وکته خادر چاینه

قصیده من کلمات الادیب،الدکتور "موسی جرفی"